REANAULT MEGANE 2

 

السلام عليكم و رحمة الله
من بعد ما تكلمنا على سيارة الفورد فوكيس الجيل الثالث في الموضوع السابق ، اليوم غادي نرجعو للسيارات الفرنسية و غادي يكون الموضوع ديالنا حول #رونو_ميغان_2

هاد السيارة كانت بداية الإنتاج ديالها سنة 2002 و فالمغرب تباعت ابتداءا من 2003 , و هي نفس السنة اللي تختارت فيها كسيارة السنة و هو الأمر اللي كايعكس نجاحها فديك الفترة .

اليوم غادي نتكلمو على الميغان الكاسكيطة ، و نفس الكلام راه كاينطبق على الميغان طويلة من ناحية الايجابيات و السلبيات ، حيت بزاف ديال الأصدقاء طلبو مني نتكلم عليها نظرا لشكلها الرياضي و كذلك الآراء المختلفة ... شي كايقول ليك الله يعمرها دار شي كايقول ليك ما صادقاش !!
بالنسبة للهيكل نقدرو نقيموه بعلامة لا بأس به ... ما فيهش الصح ديال السيارات الألمانية اللي فنفس الفترة و خصوصا بالنسبة للوزن و هادشي كايتلاحظ فالسرعة العالية و لكن فنفس الوقت حسن من سيارات منافسة أخرى عديدة ... من غير هادشي مايتعابش حيت السيارة مازال كانلقاوها متماسكة بعد مرور 18 سنة .. الصالون بالنسبة لوقتها يستحق ممتاز ، كراسي مريحة و تصميم رائع ما عدا البلاستيك المستعمل ماكانش من نوعية ممتازة ... بالنسبة للتجهيزات هاد السيارة تقدر تلقا فيها جميع التجهيزات و سبل الراحة المتاحة فديك الوقيتة ديالها ، و السياقة بها مريحة جدا و الى كانت مريكلة و كلشي هو هداك راه ماكاتحس لا بسوكوس و لا بطريق .
هاد السيارة تعرضات لتعديل سنة 2006 و هادشي غايبان ليك فالصورة , و لذلك كانفرقو ما بين الفاز 1 phase من 2002 حتى ل 2006 و الفاز الثاني phase 2 من 2006 حتى ل نهاية تصنيعها ف 2009 حيت تم استبدالها ف 2008 بالميغان 3 megane و اللي غادي نتكلمو عليها في موضوع قادم .

بالنسبة للمحركات ديالها كاينة مجموعة متنوعة ، مثلا بالنسبة ليصونص كانلقاو غالبا مول 1.4 لتر و مول 1.6 لتر و كاين واحد آخر و لكن قليل و هو 2 لتر .. و ما كانتكلمش على RS ... كانتكلم على 2 لتر كايكون حتى فلاغونا laguna و كايكون فيه اما 136 او 165 لتر ... بلا مانطول باش نعطيكم غير المختصر المفيد أحسنهم هو 1.4 حيت اقتصادي و عملي و لكن عموما مانصحكش بالميغان 2 فليصونص ، أولا ثقيلة فالبيع فالسوق و زيد 8 ديال الخيل و زيد الناس كاتشكا بزاف من مشاكل المحركات و لكم واسع النظر
بالنسبة للمازوط كانلقاو محركات مختلفة كذلك منها 1.5 لتر و 1.9 لتر و 2 لتر .. بالنسبة للأفضل كاين 1.5 لتر و لكن راه فيه اختلاف حيت فيه 4 : كاين مول 80 حصان و 85 حصان و هادو بجوج فاشلين فالطريق مقارنة مع سيارة بشكل رياضي و كاين 100 حصان و 105 أحصنة و هادو هوما اللي تاخد ف 1.5 لتر ..
اما بالنسبة ل 1.9 لتر راه فيه اللاصيان اللي خرج معاها و فيه 120 حصان و كاين اللي جا فبلاصتو باش يرومبلاصيه مورا 2006 و فيه 130 خيل ، و هاد الأخير هو اللي أفضل ، أما بالنسبة ل 2 لتر أصلا قليل فين تلقاه و الى لقيتو ما عندك ما دير بيه واخا يعجبك فالطريق حيت زايد فالكونصوماصيون و الأعطاب كثيرة.
بالنسبةللأعطاب الشائعة اولا كانت لا كارط la carte كلشي كانت خالعاه و اللي سولتو فواحد الوقت كايقوليك غير هرب هاديك راها بلا كارط .. دابا هذا ماشي مشكل حيت نسخ هاد البطائق الالكترونية راه متوفر و بثمن مناسب و حتى الليكتور ديالها lecteur de carte موجودين و بكثرة.
ليزانجيكتور ديالها كايمشيو و لكن بحال أي سيارة و هادشي قلتو فمواضيع سابقة لذلك دائما دير مازوط مزيان .
التيربو هو المشكل العويص و بالأخص فبعض المحركات كاتركب التيربو كاتمشي بيه واحد المدة قليلة كايعاود يمشي و الناس باعوها غير بنص ثمن بسبب هاد المشكل .. هنا السبب راه عندك من المحرك أخويا و اللي عندو هاد المشكل نشرحلو بالضبط علاش

بالنسبة لمشكل الالكترونيك هاد الكلام كان فاش كانو أغلبية السيارات بنظام ميكانيك و غير شي سيارات اللي عاد بانو هوما اللي بنظام الكتروني أما دابا راه تقلبات الآية و كلشي ولا كايخرج بأنظمة رقمية و حتى المعلمين ولاو كايخدمو بأجهزة الفحص الرقمي لذلك بلا مانتكلمو فهادشي راه متجاوز و هاديك هدرة قديمة .

بالنسبة للثمن فالمازوط كايكون على حساب النقا و الموديل و الديوانة و العمورية ، وحدة جايبة دوبل طوا و عامرة مايمكنش تقارن مع وحدة خاوية لذلك كانلقاوه ما بين 45 000 درهم و 75 000 درهم ، و لكن دائما نوصيك خود النقا و لا ماتاخدش حسن ليك و هادشي لا من ناحية الهيكل و لا من ناحية المحرك و الى ماكاتعرفش خود اللي ثقة يقلبليك .

كانتمنى يكون موضوع اليوم قدم افادة و لو قليلة ، , دمتم في رعاية الله و الى موضوع قادم ان كان في العمر بقية .

 

Posted in: