نصائح وإرشادات قبل شراء سيارة مستعملة

 

نصائح_و_إرشادات_قبل_الشراء

السلام عليكم ورحمة الله , بزاف ديال الناس كايبغيو يشريو سيارة مستعملة و كايحيرو كيف غا يديرو باش ما يتعرضوش للنصب . و هنا كانسمعو بزاف المصطلح ديال السماسرية و اللي كايخلطو فيه الناس ما بين التاجر اللي كايبيع و كايشري بنزاهة و ما بين السمسار اللي غير كايدخل راسو و خاصو غير البيع يدوز باش ياخد (الكاميلة) , اذن هنا كاين فرق كبير حيت البيع و الشراء ماشي عيب و حلال على شرط يكون الصدق و تكون السيارة موضوع البيع خالية من الحوادث و العيوب تماما و يتم البيع بثمن السوق, و من الأفضل تشري السيارة من عند مولاها الأصلي و حبذا لو كان هو أول مستعمل حيت غاتكون غالبا مازال نقية.

بالنسبة ليوم الشراء , سواء غاتشري من عند صاحب السيارة أو تاجر فالسيارات و اللي كلنا خصو يكون معروف و نزيه حيت هاد الدومين كثر فيه التخلويض, هنا لا بد يتم فحص السيارة و أول شيئ و أهم شيء هو الهيكل , لأنه كل شيئ عندو الحل إلا الهيكل بمعنى إذا كانت تعرضات لحادثة فدائما غا تبقى سميتها تعرضات لحادثة و هادي سيارة ما عندك ما دير بيها, كاتشوف الصباغة واش أصلية و لا معاودة , اذا كانت أصلية كاملة بمعنى السيارة راها ناضية و ما تضربات حتى فشي بلاصة اللي تستوجب الصباغة , كاتقلب الشاصي مزيا و تحت الكوفر و تحت الكوسانات الخلفية و الا ما كنتيش كتعرف دي معاك طولي و يكون شخص ثقة , من بعد الهيكل كا يجي دور المحرك , كاتلاحظ مزيان بعدا كيف داير واش داكشي كايبان فبلاصتو و لا معنفج و كثرة السكوتش و الموديفيكاسيون, كاتقلبو واش كايفيمي من بعد ما تخليه يسخن حيت الى كان بارد ما غايبينش و هنا فتقلاب ديال الموطور كايني بزاف ديال اللعيبات ولاو كايديروهوم اعداء الله و تقدر ما تدي ما تجيب واخا الموطور ميت و هادشي غاندير ايكم فيه موضوع آخر , المهم ما تنساش ترد البال حتى للصوت ديال الموطور واش هوا هداك و ضرب بيها دويرة شوف واش كاتعطي الدخان و كيف داير اللون ديال الدخان و هدا حتى نشرح لكم فموضوع آخر انواع الدخان و الدلالة ديال كل نوع و شوف لومبرياج واش ماشي حجرة زعمة ماشي قاسح باش تأكد بلي البلاطو مازال مزيان و ما تصدقش مبدل كيت دلومبرياج, و من الافضل تدي معاك مكانيك و دور معاه و تهنا و حتى هو خاص يكون كونفيونص حتى لموضوع آخر كذلك و نشرح لكم علاش كل مرة كانكول خاص يكون كونفيونص, المهم قبل من هادشي و لا بد تكون ضربت طليلة على الصالون و التجهيزات و تسول مولاها واش كلش خدام باش الى لقيت شي حاجة ما خداماش غادي تدرب حسابها و تنقصها من الثمن اللي عوال تشري بيه, و فاش توصل لا فيزيت دائما سير لا فيزيت اللي تختارها انت ماشي اللي يديك ليها هو حيت راكم عارفين المشكل ديال السيارات المدكوكة و ما أكثرها إذا دائما أكد على الموظف اللي فلا فيزيت يقلب مزيان و حملو المسؤولية .

فاش توصلو المكاتبة ديك الساعة كاتعمرو الكارطونة ديال البيعو كاتسنيو و تليكاليزيو المسائل و تخلصلو فلوسو و ماتنساش طلب الضوبل ديال الكونطاكط تاخدو معاك.

بالنسبة للوثائق ولا بد تكون تأكدت منها قبل من هادشي كامل و ماتنساش تأكد الضرائب واش خالصين و الا كنت شاري بوكالة تأكد بأنها مسجلة فدار الضريبة و مانتاهاتش الصلاحية ديالها .

دمتم في رعاية الله و الى موضوع قادم ان كان في العمر بقية.

Posted in: